Ich weiss das isch ez echli spaht. Aber gliich. ALLES GUETI IM NEUE JAHR!

Ich wünsch eu ganz vil Glück bi was au immer ihr mached das Jahr und das all eui Wünsch und Troim in Erfüllig gend. Das isch s’ersch Neujahr gsi für mich eweg vo dihei und ich ha d‘ Chälti faschd echli vermisst ;-) Also ich hoff ihr sind all guet grutschd und ich froi mich scho eu alli baaald wider z gseh… D‘Helfti vo mim Uustuschjahr isch ez scho ume und ich has nie bereut diä Entscheidig gmachd z’ha. Obwohl s’mengisch echd hert isch eifach so wiit weg vo Fründe und Familie z’sii...Es isch super so vill neui Ort und Lüüt kenne z’lerne! Wo ich zersch nach Neuseeland cho bin hani chuum chene flüssend Englisch rede. Und jetzt? Ich cha überall ahne gah, mit Lüüt rede und mich verständige. Haha und wenn ich mal dezue chum z’skype chunt’s mer komisch vor Schwiizerdütsch z’rede. Ich ha mich da uu guet iiglebt und chent mer kei besseri Gastfamilie vorstelle. Ich gnüss jedi neu Wuche und jede Tag, bi mer aber bewusst dass d’Ziit bis zu minre Abreis unvorstellbar schnell wird verbii gah. Und ich ha immer no s’Gfühl dasi ersch grad z’Züri uf de Flughafe bi gange. Woow d‘Ziit rast. Und ich wett mich bedanke bi allne wo mir Nachrichde schriibed, Charte schicked und sich immer mal wider bi mir melded. Es freut mich jedes Mal und bedütet mer vill dass ihr eu immer dena erkunded wies mir so gaht. Merci vill mal.

Ganz vili liebi Grüessli vom ander End vode Wält, lieb eu! Eui Seraina